Pawos 13

Krama Désa Adat Tamanbali utawi pamedek patut ngupadi kasucian kalih kasukretan Pura Kahyangan lan pura sane tiosan antuk:

1. nyaga karesikan pura;
2. mabusana ka pura sané anut tur pantes manut Dresta;
3. nangun upakara miwah upacara manut Dresta; mwang
4. mabaos miwah maparilaksana manut Dharma.

Busana Ngeranjing kepura wenang nganutin dresta minakadi :

haRitatkala ngaturang ayah, mawastra lan nylempot;

1. Ritatkala ngaturang sembah, mabusana jangkep;
2. Siosan kadi ring ajeng nenten kelugra, sajawaning sampun pituduh prajuru.

Sane tan kalugra ngranjing ka pura inggih punika:

1. Sang sebel ring raga, minakadi: sangkaning ngraja sawala, sang ngembasang oka durung lintang 42 (Petang dasa kalih) rahina (abulan pitung dina), sang lanang saking sang istri sané ngembasang oka durung kepus odel;
2. sang kacuntakan mawit saking kalayusekaran: ngantos puput macaru, krama sajeroning karang mwang asong garba purusa, saking ngawit lampus ngantos puput macaru;
3. jadma sané kasinanggeh leteh, luwir ipun: ngantén durung mawidi-widana, beling tan kasinangaskara, jadma buduh, sakit ila, sadurung polih kaprayascitta manut agama;
4. sang mabusana sané tan patut manut Dresta mwang tata susila ngranjing ka Pura;
5. krama Désa Adat, Krama Tamiu, miwah Tamiu sané nénten wénten paiketan pabuat ngamargiang upacara, upakara, mwang pamuspan;
6. ubuh-ubuhan, sajabaning sané mapaiketan ring upakara;
7. makta sahanan barang sané sinanggeh leteh manut agama; miwah
8. sahanan sané tan kapatutang manut Pararem utawi sané kabaos ngaletehin.

Pratingkah sane tan kapatutang ring pura:

ha.Masumpah utawi naap cor sajawaning pituduh Bandesa utawi Prajuru desa adat anut

kaputusan krama;

na.Maujar ala, ulah ala, wak parusi, nemah utawi misuh;

ca.Majaljal, mayuda napi malih jantos metu rah kabaos leteh;

ra.Ngagah wastra, pusungan miwah macecepin rare;

ka.Makoratan, mabanyu, makolem lanang istri masarengan dados asiki, macumbana matemu rasa, masanggama miwah sakancannia sane siosan;

da.Mangan nginum rauh mamunyah lan sahananing jajuden.

Ngagah busana rauhing pusungan sakadi inucap angka (3) aksara ra, kangkat utawi kadadosang wantah majeng ring sang Sulinggih miwah Pragina sané pacang ngayah masolah ring Pura.

Krama Desa Adat Tamanbali utawi pamedek mabukti ngaletehin pura wenang kadanda, panyangaskaran mwang pangaksama nunas pangampura sajeroning Paruman Désa Adat.