Pawos 23

Krama Desa Adat sane mapikarsa pacang madeg Pandita nyujur padwijatian, utawi makadi dalang, balian sonteng saluwire jagi ngenterang yadnya patut ngarauhang pisadok majeng Bandesa utawi prajuru Desa Adat Tamanbali.

Bandesa utawi prajuru desa adat patut ngadungan paridabdab pamargi nyujur padwijatian.

Krama Desa Adat sane mapikarsa pacang nyujur padwijatian, tur risampun manados sang sampun madwijati patut nginutin sadaging awig-awig lan dresta sane kantun kamanggehang. Kawentenan puniki stata kauratiang Krama Desa Adat tur prade piwal sagelis kabawosin ring jeroning paruman.

Sang pacang mepodgala utawi maduwijati sadurungne patut polih panugrahan saking Parisada Hindu Dharma lan Kantor Agama, maka cihna pacang mapodgala inucap sampun wus katitenin, katureksain indik sehanan kawentenania/paweruh lan pawongania tan ngalepasin kadi kecap sastra dresta, saha kaweruhan manut agama lan sesana sane pacang kamargiang.

Prajuru patut nitenin/nureksain mungguhing kawentenania, inggihan laksana sang pacang mapodgala, mangda jati tan lepas ring kacaping Agama.

Yan prade lempas ring kecaping agama, prajuru wenang tan ngararemin.

Risampun puput upakarania tur naben ida sampun mapica parab, prajuru patut ngawedar indik lan pamargin sang putus madwijati.

Sang mawinten sane pacang ngamargiang Nyonteng, Dalang, Ngusadain, patut masadok ring prajuru, prajuru wenang ngawas nitenin kawentenania tur nyaksiang upakarania. Selanturnia prajuru wenang ngawedar indik tetujon pamargi sang malaksana, rauhing ring wates wewidangania.

Ida sang putus sane kadegang pinaka siwa (Guru Loka Pala Seraya), antuk Desa kapatutang kadi ring sor:

ha.Upakara padiksan lan pretiwan Ida riwekas kalaksanayang olih krama Adat Tamanbali;

1. Pinaka panuntun krama Desa Adat Tamanbali ring indik Tatwa lan Upakara Agama;
2. Muputang upakara ring Kahyangan utawi upakara ring Krama Desa Adat Tamanbali;
3. Tan patut muputang upakara/yadnya, sane kantun sajeroning wicara.