Pawos 89

Sang sane pacang ngamargiang pawiwahan mayusa manut sakadi munggah ring ilikita sakeng guru wisesa (Undang-Undang Perkawinan);

Pidabdab pawiwahan ring Desa Adat Tamanbali, ngemanggehang kapurusan, sang purusa sane ngalap rabi tur kapaumahang ring sang kapurusa.

Paridabdab pawiwahan:

1. Pepadikan: sangkula Krama Desa Adat purusa madarma suaka majeng sang kula Krama Desa Adat pradana. Pamargine:

Nyedek: sang pacang mawiwaha kapurusa kasarengin guru rupakan nyane matemu wirasa majeng sang pacang mawiwaha kapradana kasarengin guru rupakan nyane;

Ngaluku: sang pacang mawiwaha kapurusa sane kasarengin guru rupakan nyane rauhing pasemetonan guru rupaka matemu wirasa majeng sang pacang mawiwaha kapradana kasarengin guru rupaka rauhing pasemetonan guru rupakan nyane;

Amet-pinet: sang pacang mawiwaha kapurusa ngambil sang pacang mawiwaha kapradana sane katodia olih pasemetonan utawi krama tur kaupasaksi antuk triupasaksi.

1. Ngerangkat : sang purusa antuk sasiliban ngambil sang pradana. Salanturnyane, kula Krama Desa Adat sang purusa ngamargiang:

Nyedek: Utusan sang kapurusa malarapan swalapatra pajanten sakeng sang mawiwaha masadu ajeng majeng guru rupaka sang kapradana sane karampih olih manggala dinas kapradana. Rikala puniki kamargiang adung babawos pamargi salantur nyane;

Maplaku: pasemetonan sang kapurusa matemu wirasa majeng pasemetonan sang kaparadana ngindikang pamargin pawiwahan.

ca.Maupasaksi: sang mawiwaha sane karampih olih pasemetonan sang kapurusa tur katodia manggala adat lan dinas matemu wirasa majeng pasemetonan lan manggala adat lan dinas pasemetonan kapradana.

Krama Desa Adat kapurusa prade ngambil kapradana seos agama pamargi kaanutang manut kawentenan. Sang pradana patut masudawadani malarapan manah ngraga. Prade nenten masudawadani tan patut kasarengan ngamargiang eedan pamargin pawidiwidanan. Sane mawidiwidana wantah sang purusa.

Krama Desa Adat kapradana prade kaambil olih seos agama tegteg ngamargiang pamargin adat/awig-awig.